इतर कार्यावळी – अखिल भारतीय कोंकणी परिशद

2010 -12 काळमानांतल्यो कार्यावळी

कोंकणी समाजाच्या वेगवेगळ्या विभागां मदें एकामेकांची लागींची वळख आनी समज घडोवपाची मोख धरून साबार मंडळान कोंकणी भास, साहित्य, संस्कृती तशेंच लोकवेद हे विशयांच्या आदारान दर वर्सा कार्यावळी घडोवन हाडपाचें थारायल्लें. ह्यो कार्यावळी म्हळ्यार ल्हान भासांच्या जाणकारां कडेन भासाभास, तरणाट्यां खातीर सृजनशीळ मेळावो, सांस्कृतिक आदान-प्रदान, जाणकारांचें व्याखान, कोंकणी रामायणाचो तुळनात्मक अभ्यास आनी परिशदेचो वर्धापन दीस. ह्या निर्णयाक अनुसरून परिशदेन 2010-2011 वर्सा तीन कार्यावळी आनी 2011-2012 वर्सा ३ कार्यावळी घडोवन हाड्ल्यो. ह्यो स कार्यावळी सकल दिल्ले प्रमाण आसात.

72 वो वर्धापन दीस

**७२ वो वर्धापन दिसाचो सुवाळो उक्तावण करतनाश्रीमती ग्लाडीस आल्मैदा**

8 जुलय 2010 दिसा कुंदापूर, कर्णाटक हांगा, जय कोंकणी हे संस्थेच्या आदारान परिशदेचो 72 वर्धापन दीस सुवाळो मनयलो. उडुपी जिल्ला परिशद अध्यक्षा श्रीमती ग्लाडीस आल्मैदा हाणीं उक्तावण केलें. आपल्या उलोवपांत ताणी सांगलें, कोंकणीच्या विकासा खातीर सगळ्यानी एकठांय येवन प्रयत्न करपाची गरज आसा. भाशेच्या माध्यमांत समाजांत भावनाप्रधान संबध घट करपाचें काम तरणाट्यानी करचें अशें ताणीं सुचयलें.

कोंकणी भास, साहित्य आनी संस्कृती तिगोवन दवरपा खातीर परिशदेन केल्लें काम तोखणायेचें जावन आसा अशें दो. तानाजी हळर्णकार हाणी आपल्या बीज भाशणांत सांगलें आनी मुखार म्हळें, चार राज्यांतल्या, वेगवेगळ्या वर्गाच्या कोंकणी उलोवपी लोकांक लागीं हाडून तांचो एक समाज घडोवपाक परिशद वावुरीत आसा.

आयच्या तरणाटे आपली भास, संस्कृती, दायज आदी विशयां कडेन दुर्लक्ष करतात, देखून तांकां भास आनी साहित्य शिकपा खातीर उत्तेजन दिवंक जाय अशें परिशदेचे अध्यक्ष दो. एच. शांताराम हाणीं आपल्या भाशणांत सांगलें.

उक्तावणा उप्रांत समाजाचो एकचार ह्या विशयाचेर जो परिसंवाद जालो, ताचे ॲड उदय भेंब्रे हे अध्यक्ष आशिल्ले. परिसंवादांत बस्ती वामन शेणै, के. के. सुब्रमण्यम, श्रीमती उषा पै हाणीं प्रबंदां मांडलीं.

आनी उपरांत तरणाट्यां खातीर विचार मंथनाचें सत्र जालें. गोंयचे तशेंच कर्नाटकाचे खूब कोंकणी तरनाटे उपस्थीत अशिल्ले.

भाशीक जाणकारांचो मेळावो

ल्हान भासांच्यो कांय सर्व साधारण अश्यो समस्या आसात. ह्या समस्यांचो अणभव ह्या भाशांच्या जाणकारानी एकामेकांक कळीत करपाक जाय आनी ताचेर विचार जावपाक जाय. ही मोख धरून परिशदेन 19 आगस्त, 2010 तारखेक डोगरी, भोजपुरी, राजस्थानी, सिंधी, मणिपुरी, सारक्या अल्प भाशीक जाणकारांचो कांदोळी, हॉटेल कोरासांव हांगा भासाभास घडोअन हाडली. ह्या भाशांच्या विकासांत खंयच्यो अडचणी येतात हाचेर विचार जालो. एकच भाशेखातीर दोन व चड लिपी वापरल्यो तर कसलो परिणाम जावंयेता हाचेरय चर्चा जाली. ह्या भासा भाशेंतल्यान ल्हान भाशांच्या समाजिक वातावरणाचो समज जालो. बिद्यानाथ झा विदित (मैथिली), चंद्र प्रकाश देवळ (राजस्थानी), स्ट्रीमलेट ड्खकर (खासी) आदी लेखकानी तशेच उदय भेंब्रे, पुंडलीक नायक, दो. तानाजी हळर्णकार, नागेश करमली, रमेश वेळुस्कार, गोकुळदास प्रभु आदी कोंकणी लेखकानी चर्चेंत वांटो घेतलो.

कोंकणी रामायणाचो तुळात्मक अभ्यास – परिसंवाद

कोंकणींत रामायणाचे वेगवेगळे प्रकार घोळटात, पुण ह्या प्रकारांचो फावो तसो अभ्यास जावंक ना. हे परिस्थितीं कोंकणी रामायणांचेर भाशा शास्त्राचे, साहित्याचे आनी लोकवेदाचे नदरेन अभ्यास सुरू करपाचे उद्देशान परिशदेन परिसंवाद घडोवन हाडपाचें थारायलें. कोंकणी रामायणाचो हो परिसंवाद 2 आनी 3 ऑक्टोबर, 2010 दिसानी मंगळूरांतल्या विश्व कोंकणी केंद्रांत आयोजिल केलो. श्री उदय भेंब्रे हाणी दोन दिसांचे हे कार्यावळीचें उक्तावण केलें.

पयल्या दिसा, उक्तावणा उप्रांत साहित्यिक विशयांचेर जें सत्र जालें, ताचे दो. हरिश्चंद्र नागवेंकार अध्यक्ष आशिल्ले. ह्या परिसंवादांत दो. सुनीता बाय, दो. सॊनिया शिरसाट आनी श्रीमती प्रियदर्शिनी तडकोडकार हाणी प्रबंद सादर केले. दूस-या दिसाच्या पयल्या सत्राचे दो. विल्यम द सिल्वा अध्याक्ष आशिल्ले आनी तांतूत दो. रोकी मिरांडा, दो. माधवी सरदेसाय आनी गोकुळदास प्रभु हाणी भाशिक विशयाचीं प्रबंधां मांडलीं. श्री रमेश वेळुस्कार हागेल्या येजमानपणा खाला घडिल्ल्या निमाण्या परिसंवादांत दो. जयंती नायक, दो. पांडुरंग फळदेसाय आनी श्री गोपाल गौडा हाणी कोंकणींतल्या रामायणांचो लोकवेद नदरेन नियाळ घेतलो.

समारोप सुवाळ्याचे श्री मत्तूर कृष्ण मूर्ती (संचालक, भारतीय विद्या भवन ) हे मुखेल सोयरे आशिल्ले.

73 वो वर्धापन दीस

**दो. इल्सूर वर्धापन दीस सुवाळो उक्तावण करतना**

08 जुलय 2011 दिसा, कुमठा कर्नाटका हांगा परिशदेचो 73 वो वर्धापन दीस सुवाळो मनयलो. सुवाळ्याचे दो. एच. शांताराम हे अध्यक्ष आनी दो. जे. वी. इस्लूर हे विद्वान मुखेल सोयरे आशिल्ले. दो. तानाजी हळर्णकार हाणी बीजभाशण केलें. गोकुळदास प्रभु, श्रीमती मीना काकोडकार आदी लेखक तशेंच दो. शिवराम कामत, नागेश शानभाग, मुरळीधर प्रभु आनी इतर थळावी संस्थेचे पदाधिकारी आनी साबार कोंकणी मोगी उपस्थित आशिल्ले.

कोंकणी लोककाणयांची विंगड विंगड तासां ह्या विशयाचेर परिसंवाद

परिशदेन 27 नवंबर 2011 दिसा, साखळी गोंय हांगा कोंकणी सेवा केंद्राच्या पालवान कोंकणी लोककाणयांची विंगड विंगड तांसां ह्या विशयाचेर परिसंवाद घडोवन हाडलो. श्री पुंडलीक नायक हांच्या हस्तुकीं परिसंवादाचें उक्तावण जालें. परिसंवाद तीन सत्रानी जालो. दो. जयंती नायक, दो. पांडुरंग फळदेशाय, गोकुळदास प्रभु, गुरुदत्त बांटवाळकार, दो. राजेंद्र केरकार, भूषण भावे आदी जाणकारानी परिसंवादांत वांटो घेतलो. शिक्षक आनी विद्यार्थी मोटे संख्येन उपस्थित आशिल्ले.

सांस्कृतीक कार्यावळीचें सादरीकरण

विंगड विंगड प्रदेशंतल्या कोंकणी भाशिक लोकां मदें कोंकणी संस्कृतीक दर्शन आनी आदान प्रदान जावपाची गरज आसा. देखून परिशदेन कुंभारजुवेंच्या श्री शांतादुर्गा कल्चरल असोसिएशनाचो आदार घेवन 22 जानवरी 2012 दिसा मध्य केरळच्या उत्तर परवूर आनी कोची ह्या गांवानी कोंकणी लोक गीत/नांचांचें सादरीकरण केलें. कार्यावळीक थळावी लोकांचो मोटो प्रतिसाद लाबलो.